PITTOR DE MILAN Che fadiga incoeu, amis pittor, fa on quader in grazia de Milan, ghe voeur proppi guzzà l’ingegn: se troeuva pù nanca on canto de quej che fan cantà i color, on post come ghe n’era cent, pien de poesia e sentiment. No, ghe voeur troppa fantasia! Piantela coi pennelad de ross, de verdesin, de giald limon, no, te podet minga adoperà el celest del ciel de Lombardia, adess l’è gris e pien de spuzz che riven giò fin’al cannaruzz. Dimm, perchè te voeuret pitturà ‘sta Milan inlocchida, on gazzaghée de motor, rumor, de mur pattusciaa de casermon, de grataciel de veder, de uffizi, de fabbrich destrugaa. Ai robb antigh g’hann faa el funeral come a la nostra Banca Commercial! Damm a trà, pensa no al panorama, varda la brava gent che sgobba, i giovin che sann minga cosa fa, i sanvincens che se sbatten a juttà tucc i deslippaa in bolletta grama. Pensa al calor de chi te sta vesin, e come brillen i oeucc di piscinin. Cerca de mett insema ‘sto quadrett. Dai, proeuva anmò, amis pittor, quel che te manca l’è on bel soggett: proeuva a pitturà… l’Amor! Gioz (Milano) |
|
|
Amici Comit News - settembre 2014